التدوينة بالعامية المصرية
من النصائح الزوجية الكارثية اللي دايماً بنسمعها إنه في حالة حدوث خناقة بين الزوجين "خدوا بريك وابعدوا عن بعض علشان تهدوا شوية"، فالست تقفل على نفسها باب أوضتها، والراجل ينزل القهوة يشد حجر تفاح ويتفرج على إعادة ماتش في دوري أسمنت أسيوط.
مبدأياً معرفش مين اللي تخيل في يوم من الأيام إن الست لما تسيبها شوية لوحدها وهي زعلانة هتهدا بقى وتراجع نفسها (بعقلانية) و(منطق) وكده.. بالعكس دي هتفضل تهري في نفسها وتفتكر لك القديم والجديد وهتفضل تعد للمعركة وتحفظ الكلام اللي هتقولهولك لما ترجع، وتذاكر ردودك في خناقات سابقة وتحضر لسيناريوهات التصعيد، وما إلى ذلك من تكتيكات حروب الجيل الخامس، وطبقاً لبروتوكولات حكماء صهيون.. فيما يكون الراجل اللي على القهوة نسي أساساً هما اتخانقوا ليه بمنتهى السذاجة والبلادة اللي في الدنيا!
نتيجة لكل ده طبعاً الخناقة الحقيقية بتبدأ بعد الهدنة دي، وكل ده وعداد النكد بيعد عليكم، وعلى الأقل خالص هتباتوا ليلة متنكدين إن ما كانش أكتر.
فالحل باختصار إنكم لو اتخانقتم كمّلوا خناقتكم to the breaking point اللي هي غالباً بتكون عياط الست.. وبعدين من هنا الراجل بيعرف يلم الدور إزاي.. وكل راجل وله أسلوبه. وبكده يبقى نزلنا بزمن النكد والمشكلة من يومين وليلة لنص ساعة على الأكثر.. والموضوع انتهى على خير بدون تطبيق النصيحة المذكورة أعلاه دي.
تلاحظ 3 حاجات من كلامي..
واحد إني ما تطرقتش أساساً مين الغلطان وسبب المشكلة.. إنت عبيط يا عم؟ الستات رضي الله عنهن ما بيغلطوش.. وإن غلطوا ما بيعترفوش وإن اعترفوا ما بيعتذروش وإن اعتذروا ما بيقتنعوش، وبيبقى اعتذار شكلي يحرق دمك أكتر وحتى ده نادراً ما بيحدث أساساً!
الحاجة التانية اللي ما اتكلمتش عنها أسلوب الراجل في لمّ الدور في نهاية الخناقة.. دي تختلف من راجل لراجل وقدرة الراجل على التحمّل وضبط النفس ودي بتفرق من شخص لآخر زي ما قلت.
الشيء التالت والأخير وهو الهدف الحقيقي من كل الكلام ده وأهم شيء على الإطلاق هو إنك ما تسيبش الست لوحدها، سواء في وقت السلم أو ساعة الحرب.. لازم تكون جنبها في كل لحظة عشان تحاول تتوقع الهجوم هييجي منين.. وإن سِبتها لازم تخلي عقلها شغال وبيهري في أي شيء زي الـMalware ما بيعمل في الـCPU؛ لأن لو للحظة الـCPU Usage قلّت عندها هتبدأ تفكر فيك وده مش حلو عشانك.. ده موضوع كبير يطول شرحه، وهاتكلم عليه وقت تاني إن شاء الله.
ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.
