ملحوظة: التدوينة بالعامية المصرية
فكرة ريجيم قاراطاي بتعتمد على حاجتين:
– أولاً: تناول أطعمة منخفضة في المؤشر السكري.
طب إيه هو المؤشر السكري الأول؟
هو مؤشر بيوضح نسبة الكربوهيدرات في الطعام، وبالتالي بيوضح نسبة ارتفاع سكر الدم لما ناخد الأكلة دي.. ودي نسبة السكر اللي بتظهر على الجهاز لما بنقيس السكر في البيت.
لما تكون الأطعمة منخفضة المؤشر السكري ده بيخلينا نشبع أسرع ونجوع بعد فترة طويلة، وسكر الدم بيرتفع بنسبة بسيطة، وبالتالي الأنسولين هيرتفع برده بنسبة بسيطة.
طب وإيه علاقة الأنسولين؟
الأنسولين ليه وظيفتين؛ أولهم إنه يوفر طاقة للجسم من الطعام اللي داخل، وبعد ما يوفر الطاقة يقوم منتقل لوظيفته الثانية وهي تخزين الطاقة الزايدة اللي ناتجة من الأكل لدهون في أماكن مختلفة في الجسم عشان نستخدمها وقت الحاجة (زي المجاعة والإضراب عن الطعام).
البنكرياس بيفرز أنسولين حسب كمية الكربوهيدرات اللي داخلة، فكل لما كانت الكارب كميتها قليلة كل لما كان نسبة الأنسولين المفروزة قليلة، وبالتالي الأنسولين مش هيلحق يخزن أي دهون، وفي نفس الوقت البنكرياس بيستريح من ضخ الأنسولين.
الأنسولين بيقعد في الدم حوالي 2-2:30 ساعة حسب كمية الطعام والشخص ونشاطه البدني.. وبعده بيتفرز هرمون الجلوكاجون اللي بيوفر طاقة إضافية للجسم من الوقود الاحتياطي اللي في الكبد، ودي وظيفته بتستمر حوالي ساعتين.
– ثانياً: هرمون اللبتين
لما بنقعد حوالي 4 ساعات بدون أي لقمة هل الجسم بينهار بسبب قلة الطاقة؟
لا طبعاً.. في الحالة دي بيتم إفراز هرمون "اللبتين" اللي بيدينا الإحساس بالشبع، واللي بيحرق الدهون المتخزنة في أنحاء الجسم المختلفة عشان يوفر لنا طاقة.
لما بناكل أكل منخفض المؤشر السكري إحساس الشبع بيفضل مستمر لأكثر من 8 ساعات، فبعد 4 ساعات من آخر لقمة أخدناها بيبدأ اللبتين تحرق من الدهون المتراكمة ونخس وإحنا شبعانين، عشان كده في قاراطاي لازم بين كل وجبة والتانية نسيب 5 ساعات على الأقل عشان ندي فرصة لهرمون اللبتين إنه يحرق من الدهون المتخزنة. وكل لما زودنا الفترة كل لما زاد الحرق
بس نقدر خلال اليوم وفي أي وقت نشرب شاي وقهوة وأعشاب (طبعاً كله بدون سكر) وماء بليمون بدون ما يقف هرمون اللبتين.
بعض الأطعمة ومؤشرها السكري (الجلايسيمي) Glycemic Index
المؤشر يظهر كمية الكارب الموجودة في 50 جم من الأطعمة وتنقسم لثلاثة مستويات:
من 0 – 55 : منخفض
من 56 – 70: متوسط
من 70 – 100: مرتفع
*** 50 جرام سكر مؤشرهم 100
أ- مجموعة البروتينات تكاد تكون قريبة من الصفر.
– اللحوم
– السمك
– البيض
– الزبادي
– الحليب
– العيران
*** السمن البلدي برده تكاد تكون صفر
ب- الخضراوات (من 100)
– الكرنب (الملفوف بكل أنواعه)، القرنبيط (الزهر)، البروكلي = 15
– الخرشوف، الكرفس = 15
– الباذنجان، الفلفل (بكل أنواعه)، الكوسة = 15
– الخيار، الطماطم، الخس، الكابوتشا، البصل = 15
– الفاصوليا الخضراء، السبانخ = 15
– اللفت (بكل أنواعه) = 15
– الجزر النيّ = 40 (الجزر المستوي = 70)
ج- البقوليات
– الفاصوليا البيضاء، الفول الأخضر، الباربونيا = 30
– العدس (بكل أنواعه) = 35
– الحمص = 42
– اللوبيا = 50
د- المكسرات
– السوداني، الجوز (عين الجمل)، البندق، الفستق = 15
– الزبيب الأسود إللي ببذر = 20
– المشمش المجفف والقراصيا = 30
هـ- أطعمة مرتفعة المؤشر
– شراب الذرة = 115
– البيرة = 110
– شراب القمح، شراب الرز = 100
– النشا = 95
– الدقيق الأبيض = 85
– البطيخ = 75
– الرز المصري: 85
– الشوفان: 60
ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.
