خلينا نتكلم عن النقاب وإخفاء الهوية شوية قبل ما أصحى من نومي ألاقيني مضطرة أقلعه عشان حد قرر فجأة يمنعه.
نبدأ بنقطة مهمة قوي.. ما ينفعش أتعامل مع النقاب على إنه ظاهرة وأشوف قابلة للمنع ولا لا.. النقاب ده فيه فئة لا بأس بها من المجتمع معتقدة بوجوده وعلى أسس دينية يتم احترامها في أي دولة "مُحترمة".. فما ينفعش أتعامل معاه كأنه حاجة يتم النقاش في منعها من عدم منعها.
هتيجي تقول لي: طيب النقاب بيتم استغلاله في أعمال إجرامية.. هقول لك صح عندك حق.
بس مثلاً العربيات بتسبب حوادث كارثية على مستوى العالم كله، وبيموت بسببها آلاف الأشخاص.. محدش قدر يقول نمنع العربيات ونتمشى على رجلينا! بل بيتم تحديد قوانين سُرعات وإنشاء طرق أكثر أمناً.. وهكذا.
وبناءً عليه برضه فيه قوانين مهمة جداً للحفاظ على الهوية بالنسبة للنقاب..
أولاً تحديد الهوية دلوقتي أصلاً اتطور في جميع الدول وفي المطارات وفيه أجهزة بصمة إيد وعين والموضوع تعدى نقطة كشف الوجه.. ومع ذلك بيتم مطابقة وش أي منتقبة في أي مصلحة حكومية أو رسمية أو في أي مكان يلزمه الأمر بصورتها في البطاقة.. وأنا شخصياً لو المُراقبة في الامتحان نسيت تتطابق وشّي بفكرها عشان دي أمانة والطلاب اللي حواليا من حقهم يكونوا متأكدين إني مش شخص تاني.
لو النقاب بس هو اللي بيخفي الوش، ما كانش حد غلب.. كده لازم نمنع عمليات التجميل من أصغرها لأكبرها؛ لأنها بتغير معالم الوجه.. نمنع لبس الجوانتي؛ لأنه بيخفي البصمة.. أو أقول كم الأحسن؟ نمنع نزول الأشخاص كلهم من بيوتهم لاحتمال حدوث الجرائم!
يجب التعامل مع النقاب على أنه شيء موجود في المجتمع خلاص، وإزاي أقدر أتعامل معاه وأتعاون مع اللي لابسينه بحيث أقدر أحافظ على أمن مجتمعي من غير ما أكون باجي على معتقدهم..
أتعامل معاه معاملة وجود شخص بحد ذاته في مجتمعي؛ لأنه بالنسبة للأشخاص دي هو جزء لا يتجزأ منهم ومن شخصياتهم ومن حريتهم في التعبير.. ما ينفعش أتعدى عليه بأي شكل من الأشكال.. وإلا أي دولة من وجهة نظرها لبس معين بيضر المجتمع تمنعه بقى وتبقى هيصة!
الدول المحترمة بتحترم معتقدات مواطينها حتى لو مختلفة مع طريقتهم.. الناس المحترمة برضه بتعمل كده.
ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.
