ملحوظة: التدوينة بالعامية المصرية
"كوني له مريم، يكن لك يوسف".. "الرجالة كلهم ولاد تيت".. "كانوا بيختموا الصلاة ويسبحوا على صوابع بعض".. "الجواز منيل بنيلة ده انتي في نعمة والله".. "ده خدها القناطر يفسحها وشالها على كتفه عادي قدام الناس كأنها بنته الصغيرة".. "الستات نكديين ولاد تيت.. إوعى تتجوز".
كل الجمل اللي فوق دي بنقرأها ونسمعها يومياً؛ نظراً لتوفر المكان الواسع اللي كل الناس بتكتب وتقول وجهات نظرها فيه.
وبين إفراط خيالي وتفريط مخلّ، توقعات الناس تشوهت والحقيقة الموضوعية ماتت في النص..
عايزين نفكر كده شوية في موضوع التوقعات.. التوقعات عليها جزء كبير جداً من استقبالنا ورؤيتنا لأي حدث أو حتى لأي شخص.
مثال:
لو سمعت إنه فيه مكان معين – المالديفز مثلاً – تحفة وواو وخطير وجنّة و.. و.. و.. وبعدين رحت المالديفز فعلياً، هتلاقيها أقل من مستوى توقعاتك.. وده طبيعي.. ليه؟ لأن التوقعات شعللت خيالك ورسمت لك صورة بتكون في 99% من الحالات مبالغ فيها جداً جداً.. (وفعلاً المالديفز مملة جداً بعد يومين بالظبط لأن ما فيهاش غير بحر وشوية عشش!).
والعكس بردو.. لو سمعت إنه فيه مكان شعبي وبيئة وعشوائي وسيئ جداً جداً -المطرية/ القاهرة مثلا عشان أنا اتربيت فيها – وبعدين رُحت المطرية، هتلاقيها سيئة أيوة بس مش بالدرجة اللي خيالك صورها لك بردو.
نيجي بقى للجواز..
الروايات والأفلام والحكايات والأمنيات و..و…و.. بتلعب جداً في التوقعات سواء بالإيجاب أو السلب..
وده غصب عني وعنك بيأثر في رؤيتنا وأحاسسينا وتصرفاتنا بعد الجواز.
الكلام اللي مكتوب في هذا المقال للناس الأسوياء الطبيعيين، سواء رجالة أو ستات.. بمعنى: فيه كتير ناس وسطنا مش أسوياء، وللأسف مش هينطبق عليهم الكلام ده.. ودول ليهم مقام آخر، ومقال آخر.
نبدأ بالشباب..
الشحن العاطفي والشحن الجنسي اللي موجود حوالينا في كل مكان، بيخلي الشباب يتجه لواحد من 3 اتجاهات:
1- الاتجاه الملتزم اللي مش عايز يعمل حاجة حرام وماسك نفسه جداً، ومستني الجواز اللي التوقعات الإيجابية والخيال المفرط صوَّر له إنه هيلاقي فيه الجنة وواحدة من حور العين يستمتع بيها آناء الليل وأطراف النهار، وخلاص بقى هيرفع إيده فوق ويستسلم للمتعة ويرتاح ويهدا ويستقر إلى الأبد.
2- الاتجاه اليائس اللاذع اللي التوقعات السلبية صورت له الجواز كأنه سجن ونكد ومصاريف ومشاكل وملل و..و..و.. ودول سابوا نفسهم للمتع بغض النظر مصدرها إيه أو مع مين.
3- الاتجاه اللي بين البينين اللي بيجاهد يكون واقعي بس مش عارف من كتر التشويش الفظيع والرسايل المتناقضة اللي نازلة عليه من كل اتجاه.. ودول بيقعوا شوية ويفوقوا شوية ويتعدلوا شوية ويبوظوا شوية..
إيه هي الحقيقة الموضوعية (من وجهة نظري)؟
1- الجواز حلو، بس فيه مشاكل وهيفضل فيه مشاكل لأن دي طبيعة الدنيا.. وكل ما تصالحت مع الحقيقة دي، كل ما هترتاح أسرع.
2- الجواز حلو، بس حتى لو اتجوزت كيم كارداشيان وسكارليت جوهانسن وأنجلينا جولي وشاكيرا مع بعض، مستحيل هيكون ممتع زي الأفلام طبعاً، لأن الفيلم ده كتبه واحد كاتب وأخرجه مخرج موهبتهم الأساسية هي إشعال هرموناتك.
3- الجواز حلو، بس مراتك دي بشر عادي ليها عيوبها وطباعها المزعجة زيك بالظبط.
4- الجواز حلو، بس لازم هتيجي فيه فترات نزول وفتور وقرف وزن و..و…و… وهتبقى شاطر لو اتصالحت بردو مع الحقيقة دي وتعاملت من المواضيع بهدوء وشاركت مراتك في الحل.. ولو مش عارفين، روحوا لمتخصص مش عيب.
5- الجواز حلو، بس أكيد أكيد هيجي على مراتك وقت ما عندهاش طاقة ترضيك وتدلعك.. عادي انت مش متجوز آيفون من أبل أداؤه ثابت وكل ما تدوس عليه يستجيب لرغباتك بمنتهى الدقة والسرعة.
6- الجواز حلو، بس دايماً هتحس إن اللي مش معاك أحلى.. يعني طبيعي جداً إنك هتشوف مروة اللي معاك في الشغل أروش وأحلى وممكن "تحتويك" أكتر من إيمان مراتك.. بس Guess what؟ مروة غالباً لو كانت هي اللي مراتك كنت هتحس إن إيمان هي اللي هتقدر "تحتويك" وتبسطك أكتر.. it is always greener on the other side of the fence
7- الجواز حلو، وهيبقى أحلى كمان وكمان لو قدرت تعبر لمراتك عن حبك كل فترة قريبة.. بيفرحوا أوي زي العيال الصغيرة أقسم بالله.. (معلش أنا عارف إن دماغك فيها مليون حاجة وشايل الهم وكده بس اضغط على نفسك شوية صغيرين وهتلاقي منها رد فعل عنب اللوز وهتدعيلي).
8- العلاقة الزوجية الحميمة ليها دور مهم جداً جداً جداً في استقرار كيميا الست زيك ويمكن أكتر.. يعني إيه؟ يعني هرمونيا ونفسياً وعاطفياً وفكرياً وكل حاجة، مراتك هتكون أهدأ وأجمل وأكثر شباباً لما تقوم بدورك كاملاً في الموضوع ده.
اقرأ أرجوك وبلاش تاخد ثقافتك الحميمة من الأفلام المحرمة؛ لأنها علمياً خطأ وتمثيل.. اقرأ عشان تعرف.. اقرأ عشان ده حقها عليك وما فيهوش نقاش.. ولما تقرأ هتعرف.. ولما تعرف هتنفذ صح.. ولما تنفذ صح هي هتتبسط.. ولما هي تتبسط، هتشهيصك وتدلعك وهتكتشف واحدة تانية خالص وربنا!
9- نقطة أخيرة وشديدة الأهمية.. الحلال والحرام مستحيل يجتمعوا في قلبك.. يعني إيه؟؟ يعني لو انت هتركز مع مروة اللي معاك في الشغل أو النادي أو صاحبتك ع الفيس، طبيعي جداً جداً إنك هتحس إحساس "زائف" إنك مش بتحب مراتك إيمان خلاص..
البنات بقى..
1- الجواز حلو، بس الرجالة تركيبهم الخلقي مش مجبول على الرومانسية.. لو هناخد مثال محمد بن عبد الله رسول الله عليه أفضل الصلاة والسلام، هل تتوقعوا إنه كان مخصص معظم وقته للرومانسية والحب مع زوجاته؟؟ ولا الواقعي أكتر إن تركيزه كان مع الرسالة وأحوال المسلمين والإسلام؟؟
طبعاً كان فيه "بعض" من الرومانسية.. لكن قليل جداً مقارنة بهموم الرسالة والأمة أكيد.
ده فضلاً طبعاً عن إن ده رسول معصوم من الخطأ وكل سلوكه مدعوم مباشرة من رب العالمين.
2- الجواز حلو، بس انتو كستات تركيبة مخكم – علمياً – مختلفة عن تركيب دماغ الراجل.. (مخ الرجال يحتوي على خلايا عصبية أكتر ومخ النساء يحتوي على وصلات أكتر بين الخلايا العصبية) وده تأثيره إيه يعني؟؟ يعني لو حاجة بانت ليكم منطقية جداً، ممكن تكون مش منطقية خالص من وجهة نظر الراجل.. وده طبيعي.. وكل ما تصالحتوا مع الحقيقة العلمية دي، كل ما هنرتاح كلنا.
3- الجواز حلو، بس مش هيكون أبداً سعادة "مطلقة".. يعني إيه؟ يعني هيكون فيه لحظات حلوة ولحظات وحشة.. فوق وتحت.. السعادة بتكون على شكل موجات أو دفعات وغالباً بييجي وراها خناق وفتور وزعل.. وبردو لو هنجيب مثال من حياة الرسول عليه الصلاة والسلام، لما ربنا فتح على المسلمين وبدأ يكون فيه فتوحات وغنائم وكده، زوجات النبي طلبوا إنه يوسع عليهم المعيشة مادياً.. من وجهة نظرهم ده طبعاً حقهم.. صح؟ لكن ربنا نزل قرآن في الموضوع وقال ما معناه إنهم لو عايزين فلوس بقى ودنيا، طلقهم واديهم فلوس.. لكن لو عايزين الآخرة يصبروا ويسكتوا.. يعني طلبهم ده ما كانش صح ولا حاجة..
ده يثبت إنه فعلاً الزوجة لو متجوزة نبي معصوم ومؤيد من السماء، بردو مش هتكون راضية 100%.. وعموماً مفيش رضا 100% في الدنيا أساسا في أي حاجة.. لو تصالحنا مع الحقيقة دي وفهمناها صح من غير تعصب، بردو هنرتاح كلنا.
4- الجواز حلو، بس الستات تركيبتهم عاطفية أكتر من الرجالة.. وده بيخلي احتياجهم للحنية والعاطفة كبير جداً وأحياناً بيكون أكبر من قدرة الراجل على العطاء.. طب نتصرف إزاي يعني؟ أولاً إننا ندرك الحقيقة دي.. وثانياً إننا نسدد ونقارب.. يعني إيه؟ يعني نتفق إن الراجل غالباً مش هيعطيكي كل احتياجك 100% وانتي بردو مش هتزعلي منه وتنتقديه 100%.. نشيل بعضينا بالراحة وكل واحد يتفهم خلقة التاني وفطرته.
5- الجواز حلو، بس مش هيبقى حلو وهتنكدي على نفسك وعلى جوزك لو توقعاتك وهمية ودايماً حاطة حياتك الزوجية في مقارنات مع أبطال أفلام وروايات أو حتى واحدة قريبتك أو صاحبتك -سواء سلباً أو إيجاباً- وفاكرة إن ده الطبيعي.. خلّي تقييمك لنفسك وجوزك وحياتك موضوعي وواقعي وقائم على شخصيتك انتي وشخصية جوزك.
*****
المقال ده كتبته بعد تحليلي لمشاكل زوجية كتير من اللي بتتعرض عليا..
المقال ده مختصر جداً جداً لكن بيتكلم عن نقط أساسية مشتركة شُفتها ولمستها في كل المشاكل اللي بتجيلي.
الجواز حلو، بس من غير توقعات وهمية..
الجواز حلو، بس نفهم
لو ظبطنا توقعاتنا وفهمنا، هيبقى الجواز حلو، ومن غير بس.
شكراً
ملحوظة:
التدوينات المنشورة في مدونات هافينغتون بوست لا تعبر عن وجهة نظر فريق تحرير الموقع.
