ملاحظة: التدوينة بالعامية المصرية.
1 – ما ينفعش تكون مصري من غير ما تكون عضّيت الحجارة بتاعة الريموت.
2 – أي حاجة مش شغالة اقفلها وشغلها أو انفخ فيها أو تفّ فيها.
3 – وقت الأذان بنوطي الأغاني بس.
4 – برطمانات المربى مصيرها برطمانات المخلل والليمون.
5 – الغيارات الداخلية بتاعة العيلة هتلاقيها في المطبخ بيشيلوا بيها الحلل السخنة.
6 – بعد ما تقلب كوباية الشاي خبط على الكوباية بالمعلقة يمكن اللي جوّه يفتح لك!
7 – الأخ لما كان بياخد الريموت بالعافية الأخ التاني كان بيروح يقف قدام الريسيفير أو التليفزيون عشان التاني ما يقلبش القناة.
8 – بيفتح النور يبص على السرير ويقفل النور ويجري بسرعة على السرير بيطمن على مكانه.
9 – بيدور في حتة من الفوطة تكون ناشفة عشان ينشف بيها وشّه.
10 – معجون الأسنان معمول أصلاً للحروق!!
11 – زيت الأكل معمول أصلاً للتسلخات!!
12 – علبه الشامبو آخر حبة فيها بنخففهم بميَّه عشان ما يفضلوش في العلبة.
13 – بتعرف إن الطيارة هبطت في المطار بسلام لما الستات يفقعوا زغرودة.
14 – كنت بتنام بلبس المدرسة عشان توفر وقت الصبح إنك تنام شوية.. ويقولك أذكى طفل في العالم!
15 – بتفتكر الرد المناسب والجامد على الموضوع بعد ما الموضوع يتم ويحصل.
بتبقى نفسك في play back ويبقى نفسك ترجع له وتقول اللي نفسك فيه.
16 – صوتك في التليفون لازم يبقى عالي على حسب بعد المحافظة اللي بتكلمها.
17 – صلاة الجمعة أهم من كل الصلوات عشان كده بيناموا فيها!
18 – لما الميّه بتقطع بتخبط على الحنفية يمكن تخاف منك.
19 – لو مستعجل دوس على زرار الأسانسير كتييير ينزل أسرع.
20 – ما ترميش الشنطة فيها كتاب دين.. شعب متدين بطبعه.
21 – باشا أنا عايز بخمسة جنيه جبنة براميلي بس وهو بيحاسب يسأل الراجل كام الحساب؟
22 – لو ضحك كتير يقول لك اللهم اجعله خير!
23 – إوعى الشبشب يكون مقلوب عشان حرام.. حرمت عليك عيشتك يا بعيد.
24 – حبيبتي أنا هنام طيب خلّي بالك من نفسك
على أساس إن السرير بتاعه على مطب في الدائري.
25 – المفاتيح معمولة عشان نفضل طول حياتنا بندور عليها بس.
26 – صاحب الكورة ما بيقفش جون خالص.. معروفة.
27 – أياً كان التعب اللي عندك اشرب حاجة سخنة وادفى كويس وخد مسكن ونام شوية وهتبقى زي الفل.
28 – الشنط والأكياس اللي أمك بتشالهم يعتبروا ثورة منزلية بالذات الشنط بتاعة المحلات النضيفة.
29 – الستات اللي مش متجوزة بتبوس 2&4&.. الستات اللي متجوزة بتبوس 1&3& ومش عارف ليه السيكونس ده!
30 – نفسي آكل في الأطباق الصيني بتاعة أمي.
31 – ما تتكلمش بصوت عالي في الحمام.. عشان ده بيت الشياطين ده على أساس إنه عنده مدرسة الصبح وأنا بأقلقه.
32 – يوم الجمعة المخدات والبطاطين في البلكونات حاجة مبهجة.
33 – حضرتك أنا شاطر في الحساب بس مش عارف إيه بيحصل لي وأنا بلم الأجرة.
34 – هو حضرتك النكد في مصر على العريس ولا على العروسة؟
35 – نفسي أشوف باب تلاجة ما فيهاش نص ليمونة بايظة وعلبة دواء صلاحيتها انتهت ولبوس سخونية.. وباقي قمر الدين الملزق وشوية نعناع دبلوا.
36 – كل ما أذاكر أنام أو أجوع.
37 – انت نمت يا حبيبى؟ آه نمت.. وده العفريت بتاعي اللي بيرد عليكي.
38 – بيكلمك على التليفون الأرضي ويقول لك انت فين؟!
39 – اللي قاعد قريب من السواق هو اللي بيحاسب على الأجرة.
40 – جملة "اللهم إني صائم" تتقال بدل الشتيمة، مش بعد الشتيمة حضرتك.
ملحوظة:
التدوينات المنشورة في مدونات هاف بوست لا تعبر عن وجهة نظر فريق تحرير الموقع.
